مجموعه من النايل (شعر شعبي)

جنتو بعيني جبل وسهولكم آني
ومنكم لفاني خبر ياريت ما جاني
*************
حزين يا نجرهم مازالهم غياب
راحو اليكَهرو العدو صاروا تلول تراب
*************
يا دار عودي بهم نبني عليج خيام
عودي بولف الجهل نزالتج بالعام
********
ظليت عكَب الولف كل طار انونغ بيه
وين اليودي الخبر للنارنه تاذيه
***********
لولا مغيور الضحى ولا هالعلم لافي
ويه جهاز الحلو جيبو جفن وافي
***********
من زود ماني هبيله الدارهم مريت
وبجيت عبرة بحزن من خاطري وكَفيت
********
كَلبي بلون الجكاره مورث وعلكَان
ظليت اباري الدرب مثل ام ولد غركَان
*************
دمعي سحاب المطر ومعارضه حالوب
ساهرت ليل الدجى عليك بس آلوب
***********
انتو مغيب الشمس واحنا على مطلاع
وشصبَّر كَلوبكم ياشوك ليهساع!؟
********
بيني وبين الترف حالن جبال ثنين
اطمي يعالي الجبل تشوف ساهي العين
**********

منك زغير عشيري اشبر واعد ايام
وبالحيف عود الكَرنفل بحضن غيري ينام
**********
الليل مابي فخر بس الهدان يفوت
واجيك شبه الضحى واجابلك بثبوت
***********
كَلبي خرابه اتهدَّم جال من بابه
سلطان عكَلي توافك جنه الهوى صابه
**********
الحيل مني ركَد واثر علي الفراك
ونيت عكَب العشا ونة كسير الساك
***********
ادريك جاهل وعكَلك بي خلل وهبال
اشلون سر الخفي تحجيه للمرسال
************
اشجم هرش بالكَلب ريان تدرونه
ومن فاركَتكم ذبل ما عاد تسجونه